Test de velocidade da túa conexión a internet
Comproba nuns segundos a velocidade real da túa conexión: a latencia (ping), a velocidade de descarga e a velocidade de subida. O test execútase no teu navegador contra o noso servidor e non cómpre instalar nada.
Como funciona o test de velocidade?
O test realízase en tres fases. Primeiro mide a latencia enviando varias peticións pequenas ao servidor e calculando o tempo de ida e volta (a mediana en milisegundos) e o jitter, que é a variación entre unha petición e a seguinte. Despois mide a velocidade de descarga descargando ficheiros de datos aleatorios con varias conexións á vez durante uns segundos e, por último, a velocidade de subida enviando datos aleatorios xerados no teu navegador.
Os resultados exprésanse en Mbps (megabits por segundo), a mesma unidade que usan os operadores para anunciar as súas tarifas. Para pasar a megabytes por segundo (MB/s) abonda con dividir entre 8: unha conexión de 100 Mbps descarga como máximo 12,5 MB por segundo.
Que é unha boa velocidade?
- Latencia: por debaixo de 20 ms é excelente (fibra); entre 20 e 50 ms é normal; por riba de 100 ms nótase en videochamadas e xogos en liña.
- Descarga: con 25 Mbps vese vídeo en 4K sen cortes; a partir de 100 Mbps varias persoas poden usar a conexión á vez sen problemas.
- Subida: importa para videochamadas, copias de seguridade na nube e emitir en directo. As conexións de fibra adoitan ser simétricas; o ADSL e moitas conexións móbiles teñen unha subida moito menor ca a descarga.
Por que o resultado pode ser menor ca o contratado
- Wifi: é a causa máis habitual. A distancia ao router, as paredes e as interferencias reducen moito a velocidade. Para medir a conexión real, conecta o equipo por cable.
- Outros dispositivos: descargas, actualizacións, streaming ou copias na nube noutros aparellos da casa comparten a mesma largura de banda.
- Límites do equipo ou do navegador: ordenadores antigos, extensións ou antivirus que analizan o tráfico e tarxetas de rede de 100 Mbps limitan o resultado.
- Distancia ao servidor: o test faise contra un servidor concreto; canto máis lonxe estea, maior será a latencia e menor a velocidade máxima medible.
Privacidade
O test só transfire datos aleatorios sen ningún significado. Non se envía nin se garda ningún dato persoal nin ningún ficheiro do teu equipo, e os resultados non se almacenan no servidor.